وجه الإعلامي تامر أمين رسالة للمطرب الشعبي رضا البحراوي خلال برنامج ”آخر النهار“ المعروض على قناة النهار بعد إعلانه عن مولوده التاسع قائلاً: «أولاً يا عم رضا مبروك ما جالك ويتربى في عزك والف الف مبروك ويارب تفرح بذريتك ويطلع دايما من صلبك ذرية صالحة تخدم اهلك وبلدك وطبعاً الكلام دا بناءً على خبر أن رضا البحراوي رزق بمولود أول امبارح والكلام إلى الآن مفيهوش أي حاجة».
وتابع حديثه: «فيه كلمة واحدة في الخبر بس عايز أقف قدامها وهي أن الفنان رضا البحراوي رزق بمولوده التاسع اللهم صلي وسلم وبارك على سيدنا محمد وقبل ما اتكلم يا عم رضا خمسه ف عيني وعين اي حد ميصليش ع النبي بس انا عايز أسالك سؤال واحد بس يا عم رضا ….مش كتير؟؟؟»
وأضاف: «هتقولي وأنت مالك، هو أنت اللي هتصرف عليه وهتربيه، هقولك ربنا يقدرك وتطلعه أحسن الناس، بس هو كتير علينا وعلى مصر، وكلامي مش بس لرضا، كلامي لكل رضا وكل الناس التانية اللي فاتحة باب الخلفة على البحري».
وأكد أن الجهاز المركزي للتعبئة العامة والإحصاء استعرض آخر احصائيات المواليد في مصر حيث أظهرت أنه كل 14 ثانية يولد مولود جديد واستكمل قائلًا: «بمعنى 4 مواليد كل دقيقة عايزين 4 أماكن في المدارس، و4 أماكن لا قدر الله لو مرضوا في المستشفيات، وعايزين 4 أماكن في المواصلات، ودعم وبطاقات التموين وشقق وفرص عمل».
وأختتم تامر حديثه قائلاً: «ياعم ما تاخد عزوتك من صحابك، من أهلك وناسك، يعم خد عزوتك من ولادك بس اتنين تلاته أو حتى أربعة، مش تسعة!، هو تقريبًا المشكلة في شعرك يا رضا، وعمومًا أنا بقول لكل الناس في مصر براحة على مصر، إنتوا شايفين الأوضاع والأزمات والأسعار والموارد، واحدة واحدة.»
